我有兩隻狗，黑色果隻三個月大，叫"陀地妹"，大果隻，三歲大，叫"傻仔B"。 "傻仔B"同"陀地妹"都係我由細細個養大的。教狗如教人，教狗當中亦悟出教人的道理，就係"打狗"的問題。

我承認，我有打過牠們，因打是最有效，最快令他們停止錯誤的行為，亦是令牠們最深刻的。雖然我未被說服，但有很多人教狗已經絕不會打，因打得多，隻狗會唔跟你，怕左你。

我們這一代很多家長都是會打我們的，不至於打傷，但打打手板，藤條fit兩下總有。但原來教仔不一定要打的，我前陣子去澳洲，在老麥食緊野，有件鬼仔BB爬左入個花槽玩，老豆警告左一次都係咁，所以老豆扯火，我坐係隔離，以為條鬼佬一定打落去，點知老豆走去攞左張BB凳過來，抱起個仔塞他坐落去，唔俾起身，「坐監」十五分鐘。個BB可能都慣晒，雖不情願，但都無乜出聲。

我未教過仔，我在想，當我有仔時，我會不會打仔呢。其實，對「打仔」的睇法，是會一代一代改變的。從前的人，覺得生得你出，打死你都得。現在，打小小可能仲接受得到，但打到有傷勢的，有人報警，父母會被控虐兒。希望我們這一代，或是下一代，睇法會再改變，不想見到將用暴力解決問題的態度一代一代傳下去。